اسم البرنامج: مقابلة خاصة
مقدم الحلقة: ريما مكتبي قناة العربية
تاريخ الحلقة: الأحد 23-7-2006

ضيف الحلقة: إلياس المر (وزير الدفاع اللبناني)

ريما مكتبي: بعد أيام من متابعة المواجهات الميدانية لا بد أن يعني نتوقف عند وزير الدفاع اللبناني إلياس المر لمتابعة الأوضاع الميدانية، شكراً على استضافتك لنا معالي الوزير..

إلياس المر: أهلاً وسهلاً.

ريما مكتبي: يعني أكثر من 300 قتيل وألف جريح من يعني بدء الحرب على لبنان حتى اليوم، كيف تصف الوضع الميداني حالياً؟


توصيف للوضع الميداني على الأرض

إلياس المر: الوضع الميداني الحالي يتلخص بكلمتين قبل ما نفصل المواضيع الأخرى، أكثر من 300 شهيد 350 شهيد ألف جريح، وأنا أعتبر الحرب ما بلشت لأنه ما فيه توازن قوى بهالحرب، إسرائيل عم ترتكب مجزرة بحق الشعب اللبناني حتى اللحظة، إسرائيل عم تضرب جسورنا، إسرائيل عم تدمر ضيعنا، إسرائيل عم تقتل وتهجر أهالينا، إسرائيل ضربت البنى التحتية اللي بناها لبنان بآخر 10- 15 سنة، إسرائيل ضربت كل مكونات البلد تحت عنوان إنه انعمل عملية من حزب الله انخطف لها جنديين، السؤال الأساسي اللي عم أطرحه، عملية عسكرية على عسكر انخطف فيها جنديين، انأسر جنديين، السبب إنه عنا مساجين بالسجون الإسرائيلية إلهن عشرين وثلاثين سنة، عم تطالب فيهن الدولة اللبنانية والمقاومة والأمم المتحدة، وما بقي حدا ما طالب تا نحل هالمشكلة وما كانت عم تنحل، المقاومة خطفت هالاثنين وأسرتهن عملية خطف وأسر، وإذ نتفاجأ إنه شنت إسرائيل حرب على الشعب اللبناني المدني، دمرت البلد، قتلت الناس، رجعت لبنان عشرين وثلاثين سنة لورا، عاملة حصار بحري وبري وجوي، شاحنات أدوية من الإمارات مشكورين وغير دول تنقصف على الطرقات، جيش لبناني نائم بسكناته فوج أشغال شغلته يبني جسر حديد صغير ليخلي جرحى، يبعث تراكتور ليفتح طريق ليخلي ناس بالضيع مطوقة، تُقصف هون جانب وزارة الدفاع 300 متر عشر شهداء و4 ضباط شهداء وأربعين جريح 5 غارات طيران، هيدي تعتبر حرب طبيعية مسموح فيها دولياً، ومنسمع إنه دول بعدها فاتحة المجال لاستمرار هذه الحرب، وقت اللي أنا أؤكد لك..

ريما مكتبي: من هي هذه الدول اللي فاتحة المجال لاستمرار الحرب إذا منسميها بالاسم يعني؟

إلياس المر: هلأ شفت خبر على التلفزيون إنه مجلس النواب الأميركي أعطى الغطاء لإسرائيل لاستمرار الحملة، حملة شو لهلأ عم تعمل شو؟ عم تحرر بدها تحرر الأسرى الاثنين..

ريما مكتبي: نعم هل تأثرت المقاومة؟ يعني شو تقييمكن العسكري وتحليلكن العسكري لقدرة المقاومة وتأثرها من عناصرها وجنودها؟

إلياس المر: قدرة المقاومة بتعرفها المقاومة..

ريما مكتبي: تقول أنها لأشهر..

إلياس المر: والسيد حسن نصر الله مبارح كان عنده مقابلة على قناة، وقال إنه ما تأثروا بشي..

ريما مكتبي: هل صحيح هذا الكلام؟

إلياس المر: ونحن كجيش لبنان نراقب على الأرض شو الوضع العملاني على الضبط، منشوف إنه قدرات المقاومة في الجنوب بعدها مثل ما هي، في الضاحية الجنوبية عم بتشوفوا مثل ما عم نشوف على شاشات التلفزة السيد حسن نصر الله وقياداته موجودين وعم يعطوا تصاريح، فإذاً إسرائيل لهلأ شو عملت؟ دمرت لبنان، هجرت شعبه، قتلت شعبه، ذبحت المدنيين، ذبحت الجيش اللبناني بسكناته اللي وظيفته يساعد الناس، دمرت لبنان اقتصادياً هذا اللي عملته إسرائيل لغاية هاللحظة، والأكثر من هيك والأخطر نصبّت نفسها منفذة 1559 يعني دفنت 1559 اللي هو قرار أمم متحدة..

ريما مكتبي: دفنته يعني دفنته أو عم تنفذه بالقوة؟

إلياس المر: ما طلبت منها الأمم المتحدة تنفذ القرار 1559، طلبت من الحكومة اللبنانية تنفذ 1559 وكان جواب الحكومة اللبنانية مجتمعة ببيانها الوزاري بصوت كل الفرقاء السياسيين من الشيخ سعد الحريري وتيار المستقبل، من الوزير وليد جنبلاط والحزب الاشتراكي وكل الفعاليات، من العماد ميشيل عون والقوات اللبنانية والكل شو عم يقولوا؟ تنفيذ الـ 1559 فيما يعود لسلاح المقاومة هو حل سياسي في الداخل، وعم ينشغل كان على طاولة الحوار على هالموضوع ودرس الإستراتيجية الدفاعية، وكيف بدها تتم..


ريما مكتبي: نعم معالي الوزير يمكن القول في هذه النقطة أن حزب الله أيضاً لم يلتزم، وبالتالي يعني كان فيه هناك بعض الانتقادات عن توقيت العملية اللي أجراها حزب الله، مع أنه الأمين العام لحزب الله السيد حسن نصر الله كان يقول منذ أشهر أنه يعد لمفاجأة معينة، شو رأيك بتوقيت العملية؟

إلياس المر: أنا رح سلم جدلاً بكل الذرائع الإسرائيلية وغيرها، إنه بدي سلّم توقيت غلط، على باب موسم الصيف، ليش انعمل هيك؟ عال، موافق ما بدي ناقش هالموضوع، فيه جنديين أسروا بعملية عسكرية من حزب الله ضد عسكر إسرائيلي، الكلفة على لبنان والشعب اللبناني بتساوي هيدي العملية؟ هذا السؤال اللي مفروض نسأله مش العكس، يعني نحنا اليوم اللي منجي نسأل نفسنا إنه هل التوقيت صح أو غلط؟ هذا يُسأل بعد الحرب، هذا لا يُسأل بالحرب، هل نحنا اليوم نعطي ذريعة لإسرائيل إنه والله التوقيت غلط معك حق تعالي دمرينا.

ريما مكتبي: لا، ولكن يعني قدرة التفاوض هي بين حزب الله وإسرائيل طبعاً بطرق غير مباشرة، هناك يعني مساومات أو يعني تنازلات يجب أن تقدمها الأطراف، ولكن حزب الله يعني يعلنها حرب مفتوحة، هل توافقون على حرب مفتوحة في لبنان؟

إسرائيل هي التي أرادتها حرباً مفتوحة

إلياس المر: يعني لغاية هاللحظة إذا بتتابعي المأساة اللي صارت العملية، بـ 12 تموز لغاية اليوم خطفوا أُسروا الجنديين، أعلنت إسرائيل الحرب المفتوحة على لبنان، وبلشت من ضرب مطار بيروت للمرافق للقرى، وبلش حزب الله ساعتها بالرد، تضرب إسرائيل عم بيرد حزب الله، وموقفهن هنه واضح ومبارح أعلنوه نحنا عم نرد لما عم ننضرب، معناتها هذه الحرب المفتوحة قررتها إسرائيل مفتوحة، وقررتها على الشعب اللبناني، وحطت الشعب اللبناني كله بسجن، وعم بتخيرنا بين العمالة لها اللي تؤدي لحرب أهلية أو الاستسلام، بقى أشرف من العمالة ومن الاستسلام الشهادة في سبيل لبنان، ولو لمرة واحدة كل هالطوائف اجتمعت مع بعضها وقالت كفى لهذا العدوان اللي إله ثلاثين سنة عم يدمر بلدنا، بينطر بلدنا ليوقف على إجريه لبنان بخوف إسرائيل، بخوف بطاقاته البشرية بخوف بطاقاته الطائفية، بخوف باقتصاده، بيخوف بنظامه المصرفي، بخوف بسياحته بخوف بانفتاحه العربي بخوف بخدماته، ما حدا ينغش ويعتبر إنه الحرب الإسرائيلية على لبنان فقط لأنه إسرائيل انأسر لها جنديين.

ريما مكتبي: إذن كانت مقررة هذه الحرب من قبل إسرائيل ويعني اتخذت من عمليات حزب الله الأخيرة كذريعة هذا اللي عم تحاول تقوله؟

إلياس المر: مبارح اقرأ على الانترنت بالصحف الإسرائيلية كلام صادر عن الحكومة الإسرائيلية إنه نحنا كنا مقررين هذه الحرب وناطرينها.

[فاصل إعلاني]

ريما مكتبي: يعني حضرتك وزير الدفاع في الحكومة اللبنانية لم تتخذ القرار في السلم وفي الحرب، ولم تتخذ القرار في الحرب وتتحدث عن المقاومة ولا تتحدث عن الجيش، أين الجيش؟

إلياس المر: أولاً ما عم بتحدث عن المقاومة عم جاوبك على أسئلتك اللي سألتيني ياها بموضوع المقاومة، أنا ما عم بحكي إلا عن الجيش، وأنا ما شغلتي دافع عن المقاومة، المقاومة عندها القدرات الكافية تدافع عن حالها، المقاومة بعملها السياسي والأمني والعسكري وحدها وتطمنوا كثير بعيدة عن الجيش.

ريما مكتبي: ما إلها علاقة بالجيش؟

إلياس المر: لا من قريب ولا من بعيد أصلاً..

ريما مكتبي: فيه تنسيق؟

إلياس المر: ما فيه تنسيق لسبب، المقاومة أعلنت منذ تأسيسها إنه عملها سري، أعلنت منذ تأسيسها إنه عملياتها خاصة فيها ما بتبلغ حدا عنها وأكبر برهان على هالشي، إنه إن صارت عملية أسر الجنديين الإسرائيليين وإجت إسرائيل دمرت وقصفت الجسور والقرى، شو صفى الجيش بالجنوب اللي متواجد اليوم؟ مقطوعة أوصاله عن قيادته، ما له ممون بذخيرة كافية، ماله ممون بأكل كافي.

ريما مكتبي: إذاً الجيش ضحية؟

إلياس المر: لا، إله شرف الجيش يكون ضحية وطنه هذا دوره الأساسي، ماله ضحية الجيش، الضحية هو الضعيف، الجيش هو الأقوى للدفاع عن الوطن، الجيش ما حدا يزايد عليه.

ريما مكتبي: بس احتكرت المقاومة هالدور..

إلياس المر: ما حدا بيحتكر هالدور، لن نسمح كجيش لبناني للمقاومة أن تأخذ دور الجيش، ولا نريد أن نأخذ دور المقاومة، لا نحنا مقاومة ولا هم جيش لبناني مؤلف من كل الطوائف مسؤوليته حماية الوطن، مسؤوليته السلم الأهلي، مسؤوليته الانتشار في جميع المناطق اللبنانية كونه مقبول من كل اللبنانيين لأنه من كل الطوائف..

ريما مكتبي: والحدود كمان؟

إلياس المر: هلأ منوصل لهذا الموضوع.. لهالسبب خليني كون واضح، إسرائيل عم تضرب الجيش وعم تضرب الأهالي المدنيين، تحت ذريعة الجيش نسقّ مع المقاومة، منجي نحنا بإعلامنا نطرح هالأسئلة منكون عم نلعب لعبة إسرائيل..

ريما مكتبي: ولكن الإعلام دوره إنه يسلط الضوء على الحقيقة ويكون أقرب إلى الحقيقة مثلاً؟

إلياس المر: الدور الإعلام يسلط الدور على الحقيقة، ودور الإعلام يعرف الحقيقة ليسأل السؤال الدقيق لما نكون بوضع حرب.

ريما مكتبي: نعم تقول إسرائيل مثلاً باستهداف كفر شيما منذ يومين بأنه كانت هناك صواريخ يعني تمر في تلك المنطقة، ونحن نعرف أن هناك تواجد كبير للجيش اللبناني، وحضور كثيف للجيش هناك، هل فعلاً يعني فيه حركة صواريخ وتنقلات صواريخ لحزب الله داخل الأراضي اللبنانية؟

إلياس المر: بدي قولك شغلة، إذا حدا بيصدق إنه مقاومة عملها سري وطبيعة عملها سري نحنا ما منعرف شو عم تعمل، نحنا نتفاجأ بعملها، ناطرة تا تمرر صاروخ على طريق الجمهور ساعة المعركة بقلب بيروت شو بدها فيه الصاروخ؟

ريما مكتبي: طيب والبقاع وطريق سوريا ولبنان يعني الحدود؟

إلياس المر: ممكن..

ريما مكتبي: هل ترصدون عبر المعلومات هذه الصواريخ؟

إلياس المر: مش شغلتنا..

المر: نحن ليس عملنا التجسس على المقاومة

ريما مكتبي: أليس لدى يعني الجيش اللبناني شبكة مخابرات؟

إلياس المر: نحنا ما شغلتنا التجسس على المقاومة، نحنا شغلتنا.. اليوم دور الجيش الأساسي ثلاثة أشياء، واحد الدفاع عن الأرض مهما كانت الكلفة، اثنين.. بالتنسيب مع الأمم المتحدة وهلأ كان عندي السيد بيتر سون ممثل الشخصي للسيد كوفي عنان، التنسيب مع الأمم المتحدة لنؤمن الإسعافات والأدوية والمونة اللازمة للمواطنين الأبرياء، اللي قتلتهن وهجرتهن إسرائيل، ثلاثة الأمن في الداخل اللبناني، هذا دور الجيش، دور الجيش مش يتجسس على أولاد وطنه أبداً، دور الجيش إنه يحمي الوطن، اثنين ما منسمع من عشر أيام لليوم إلا تشكيك إنه ضربوا رادارات الجيش حتى ما الجيش يعطي المقاومة معلومات، كأنه الجيش اللبناني عنده رادارات مهمة جداً وقادرة ترصد هالأمور، رادات الجيش عمرها 30 سنة، وهذا الجيش بلحم كتافه وبدمه وبدم شهداؤه عم يدافع، وعم يعمل حماية للبنان، واليوم موجود على أرض الجنوب وسيصمد بالإمكانات الضئيلة والفقيرة اللي عنا ياها.

ريما مكتبي: ستتوجهون إلى الجنوب يعني لمواجهة أي غزو بري ستشنه إسرائيل على لبنان، هل ستشاركون مع المقاومة في الدفاع عن أراضي لبنان؟

إلياس المر: نحنا ما منشارك حدا في الدفاع عن لبنان، نحنا واجباتنا بالدستور ندافع عن لبنان كجيش لبناني وهدا دورنا، اللي بيحب من المواطنين اللبنانيين مسيحيين ومسلمين يدافع عن أرضه أهلاً وسهلاً فيه، لكن برجع أؤكد المواطنين اللي بيحبوا يدافعوا عن أرضهن والدفاع عن الأرض بعدة طرق بمساعدة الجيش بالأكل والشرب، بدعم الجيش معنوياً، بالكلام عن الجيش بالإعلام، بدعم الجيش سياسياً لأنه هاي حرب مفتوحة على كل الصعد، أما المقاومة تدخل إلى الجيش وتقاتل مع الجيش هيدا أكيد مش وارد، لأنه لا الجيش بيعرف يقاتل مثل المقاومة، ولا المقاومة بتعرف تقاتل مثل الجيش.

ريما مكتبي: طبعاً القتال العسكري يختلف..

إلياس المر: بالمرة ما إلها علاقة..

ريما مكتبي: نعم دعني أسألك لماذا تم ضرب ارادارات للجيش اللبناني وطبعاً مراكز أخرى ولكن الرادارات بالتحديد؟

إلياس المر: تم ضرب الرادارات لبعث رسالة للجيش اللبناني إنه اقعد على جنب، وما تتدخل في هذه الحرب لأنه ستُضرب وستذبح بالطيران، بس هيدا مش الرسالة اللي أرادت توصلها إسرائيل للجيش تا تحميه، هيدي الرسالة واضحة جداً، اقعد على جنب يا جيش بتخلص هذه الحرب، وعندما سيكلف الجيش في دور حماية الوطن والحفاظ على الأمن بالداخل سيتفتت الجيش كونه تخاذل أمام إسرائيل وما قام بواجباته الوطنية وبدوره، لهالسبب يطمنوا تماماً، إذا فكرهن بدهن يضربوا الجيش تحت عنوان إنه الجيش اللبناني عم بقاتل مع المقاومة بأكد لهن تماماً لا المقاومة عايزة نقاتل معها، ولا نحنا نقبل نقاتل مع حدا، نحنا رح نقاتل على الأرض وحدنا، رح ندافع عن أرضنا وحدنا وهاي واجباتنا، وما رح نخلي ولا المقاومة ولا حدا يزايد على الجيش اللبناني بأي دور واجبات الجيش اللبناني يقوم فيه، لهالسبب الذرائع سقطت، الجيش هو الأقوى في الدفاع عن الأرض لأنه هذا حقه وهيدي أرضه، وأرض الجنوب هاي أرضنا، وأرض لبنان هاي أرضنا، وتراب الجنوب هيدي ترابنا، والجيش اللبناني اللي اليوم موجود بصور وبهالمناطق لما نحنا تضعف معنوياتنا نتصل بالألوية اللي على الأرض ومناخذ معنويات منهن، ما فيكي تعرفي حجم الوحدة الوطنية اللي موجودة اليوم بالجيش من المسيحيين والشيعة والسنة والدروز، كلهن على فرد قلب ناطرين الساعة اللي بدها تدخل فيها إسرائيل على الأرض ليلقنوها درس بري نتيجة الذبح اللي قامت فيه بالطيران على المواطنين الأبرياء، وعلى الجيش اللبناني وعلى القرى والبنى التحتية اللي عم نعيشها من 10 أيام لليوم.

ريما مكتبي: سؤال أخير يعني وبإجابة كثير مقتضبة لأنه الوقت داهمنا..

إلياس المر: ما تواخذيني لو قاطعتك.. ما عم نتمرجل منعرف قدراتنا، ومنعرف إنه نحنا منّا بحجم الجيش الإسرائيلي لنهزمه، ولكن منعرف تماماً إنه نحنا واقفين على أرضنا وقاعدين بحفرنا لندافع عن أرضنا، أمامنا خيارين إما العمالة أو الاستشهاد، نقينا الاستشهاد لنحافظ على الجيش ووحدته وقوته ودوره ما بعد الحرب ووحدة الوطن.

ريما مكتبي: نعم سؤال يعني سؤالين بطريقة موجزة كثير الإجابة لأنه داهمنا الوقت، أولاً يعني تتكلم عن فتنة داخلية، يعني دور الجيش الحفاظ على الاستقرار في الداخل، هل تخافون فعلاً من فتنة داخلية في حال استمرت الحرب؟ وهل الجيش جاهز للانتشار على الحدود؟

إلياس المر: إذا خسرت إسرائيل أهدافها اللي وضعتها عسكرياً، لأنها ربحت بالأهداف المدنية لهلأ اللي بدها تدمره من البلد دمرته، بدها تجرّب مباشرة تنتقل لخلق فتنة بالداخل، وهون دور الجيش الأساسي، لهالسبب لما بيكون الجيش صامد بأرضه ما حدا قادر يزايد عليه لا طائفة ولا حزب، بيقدر يكون بالداخل هو الأقوى، وبدي أبعت رسالة من خلال العربية: أي فريق بالداخل من أي طائفة اللي كانت بده يجرب يخلّ بالأمن، وهلأ موسم العمالة بيبلش ينمو، أي فريق بالداخل بده يجرب يلعب بالأمن سيكون الجيش حازم وصارم بهذا الموضوع لمنع الفتنة الداخلية اللي بدها تزرعها إسرائيل عندما تُهزم في حربها البرية على الأراضي اللبنانية.

ريما مكتبي: جاهزين للانتشار على الحدود؟

إلياس المر: جاهزين للانتشار بكل لبنان رأسنا مرفوع وليس متآمرين على لبنان.

ريما مكتبي: وزير الدفاع اللبناني شكراً على استقبالك للعربية، وطبعاً حمى الله الجيش واللبنانيين المدنيين شكراً لك، أعتقد أن الوقت داهمنا نعود إلى استديوهاتنا في دبي.