وكله ع المكشوف وشوف
المستخبي ذاع وشاع
يا فارس الحلم النبيل
يا حلم جيل من بعد جيل
دلوقت لاشئ مستحيل
واياك تتوه
يا شعبنا الحر الحسيس
يا ولاد حوريس
آدي الهويس
وحتفتحوه
يا أمة قومي فتحي عينيك الوساع
شوفي الغنا لبكره بيعلي في الميدان
يملا الودان
والفجر بان
بس الآدان
بيخنقوه
بكره اللي جاي بالضي
وبحق الشهيد الحي
مدوا له الدراع
استعجلوه واستقبلوه
وكله في الإمكان وكله مستطاع
وأي حلم بتحلموه من حقنا
وبعقلنا الشاب النور
حتحققوه
أحسن وسيله للدفاع هي الهجوم
علي عش بوم
غشوم
مشوم
وع البتاع اللي سقط عنه القناع
حننطلق من الدفاع
للاندفاع
وأكيد حنقدر كلنا
ونور قلوبنا يدلنا
ده إحنا في إيدينا الدفة والريح في الشراع

- يتبع -

كوكو

يا بياعين الكدب
يا بياعين الكدب بطلنا شرا
بضاعتكوا بايره
كان زمان قوي وجبر
السر في الأيام دي مش في البير
ده طير بيطير
وكل الدنيا شافت الخبر
بس انتوا ما بتاخدوش عبر
بتكرروا نفس الكلام
والاتهام
والشوشرة والانتقام
والافترا
الثورة مش تهمه
إنما الجريمة واضحة لمن يري
بتقتلونا من بعيد
وتطلعوا تحيوا الشهيد
وتضحكوا في كماكوا وانتوا في الدرا
وتهقهقوا بضمير بليد
وربما تستهزأوا باللي اتسحل واللي اتعور
واللي اتقبر
يا رباية الزمن القديم
يا رباية الزمن القديم المستجد
المستديم
المستبد
ابن اليهودية اللئيمة
ابن الزنيم
اللي إذا اتمكن غدر
كان ألف لعنة عليه
غباؤه ألمعي
حفظها صم , ولم يعي عقله اللي قد الترترة
كبرت معاه
إن الخيانة والعمالة ضمانة للسلطة
وإن السلطة لذة مسكرة
فطموا العيال ع اللي سبق
سف وسرق
كل النبق
يا بخت مين لغ وهبر
يا ريتنا نفهمها
ما نمشيش في الغلط
ونقول مصالحة وعفو , نظام مختلط
يجمع ما بين ماضي غبر
بوشوش قديمة بصبغة متخبيش كبر
علي حبتين إصلاح
وكلمة مؤثرة عن هدم دولة
اترمي جيل الشباب للمجزرة
يا خلق أهوه
شوفوا الحقيقة السافرة
إحنا بقينا في بكره
والنور اتبدر
ياللي انتوا لسه مكلبشين في ضلام سنين غابرة
وليالي غابرة
لا الأمريكان ولا الصهاينة ولا عرب متصهينين
لازقين علي عروش خاينة بشوية غرا
ولا فلوس في إيدين فلول متآمرة
حينجدوكوا
إمتي كانوا الغرقانين بيمدوا إيد لغرقانين
في شبر ميه في مختبر
وحق دمنا اللي سال
بايدين وحوش متجبرة
والدم غالي وعمره ما بيروح هدر
اللي اتكسر ما يتجبر
واللي خرج من قمقمه مارد محال تلجمه
أو ينجبر
والناس دي لا هي للركوب ولا للكرا
لأ شوف كمان
الناس طوفان , أفواج ورا أفواج , أمواج هادره
ومن النهارده ولا بالعصا ولا بالجزر
واسمعني يا بتاع
يا اسمك إيه
حتسيب لنا بكره
إحنا أولي وأدري بيه
وتنذكر
فتنشكر
فتعتبر
يننكسك
ونكنسك
ونتوهك
توهة الغجر

- يتبع -

كوكو

عالم جديد
حر وسعيد
مبقاش بعيد
فجره الوليد
حر وعفي
مصر الضمير
والحق دينه ومذهبه
وعالم الضلمه القديم
ظلمه الغشيم
لا بينسحب ولا يختفي
لكن أكيد حيختفي
وحينكفي اللهو الخفي
ونار سعاره تنطفي
النور لا ضلمه ترعبه أو تحجبه
والحق ظاهر وشه طاهر
لا البداوة ولا العداوة ولا الغباوة ولا الحماوة تغصبه
ولا فيش فتاوي تحجبه
والمصري مش حا يلين لمين يوم غلبه
أو أرهبه
لمن سلالة أجنبي ولا من حثاله دون غبي
لا مفتري ولا عسكري ولا مشتري ولا أشعري ولا مذهبي ولا طائفي
طول ما العقول متنوره
إرادتنا مش متزوره
نقدر ننقي ونصطفي
ويا ويله مين هان شعبنا الحر الأمين أو أغضبه
فين الضمير
هو انتوا مش بتتعبوا
فين القصاص بالحق
والناس تقتنع وتكتفي
الناس دي لا زنازين تساعها
ولا الجيوش تقدر علي إخضاعها
آه ولا تنخلع من الجدور وتتنفي
وطريق سلامه
إمشوا بكرامة
وارحلوا عنا بسلام
أو جربوا نار شعبنا الحر الوفي
الوقت بيضيق اهربوا
ده لو لحقتوا تهربوا
إحنا يا هما

قومي يا أمة اهتفي
ينتصر دم الشعيد
ومدي إيد للجنة ويا الشيخ عماد
والنور يقيد
وندور مع الحور اللي زافين موكبه
مع موكب الفجر الجليل
ارحل يا ليل
يا نبعترك شذر مذر
واعقل يا ليل
وارحل عن الريف والحضر
وشوف يا ليل
كل الضلام في الدنيا
شمعة تغلبه
وان كنت وحش نحش نابه ومخلبه
وان كنت ويل إحنا اللي بنزيل الكدر
وإن كنت حاتزغبر إيدينا تقلبه
وإن كنت موت إحنا اللي علينا الهرم
هرم الخلود , حجر , حجر
وإن كنت باب مقفول إيدينا الحرة , دقات القدر
مين ده اللي يقدر ع القدر
إذا حضر

القصيدة بصوت الشاعر الجميل سيد حجاب



كوكو

شعراء: استشهاد "مبارك" بالشعر يشبه "لعبه فى مناخيره"

الأربعاء، 22 فبراير 2012
كتب بلال رمضان

حالة من الضحك سيطرت على عددٍ من شعراء مصر الكبار، حينما علموا أن الرئيس المخلوع "محمد حسنى مبارك" عندما تحدث لمحكمة جنايات شمال القاهرة، برئاسة المستشار أحمد رفعت، ظهر اليوم، الأربعاء، استشهد بالبيت الشهير، الذى يقول "بلادى وإن جارت علىّ عزيزة..وأهلى وإن ضنوا علىّ كرام"، دفعتهم لوصف "مبارك" بإلقائه للشعر، أنه أشبه بلعبه فى "مناخيره" حينما ظهر على شاشات الفضائيات فى أولى جلسات محاكمته وابنيه علاء وجمال واللواء حبيب العادلى، وزير الداخلية الأسبق، و6 من مساعديه، فى مقتل المتظاهرين.

فما أن علم الشاعر الكبير سيد حجاب من "اليوم السابع" أن "مبارك" استشهد بهذا البيت إلا وضحك قائلاً، "مبارك ده مسلى والله بجد..فجأة افتكر أنه فى حاجة اسمها ثقافة"، أما الشاعر أحمد عبد المعطى حجازى، فقال إن المخلوع "مبارك" يعلم أن لغة الشعر مؤثرة، وأنها من الممكن أن تحرك نفوس المتلقين، ولكنه – مبارك – يعلم جيدًا أنه هو من جار على بلاده، وأن بلاده لم تجر عليه، لأنه طغى عليها وبغى واستبد ثلاثين عامًا وسلط عليها من جاروا عليها وأذلوا أهلها، وأفسدوا حياتها وأورثنا أوضاعًا لا ندرى كيف نخرج منها حتى الآن.

وقال الشاعر عبد المنعم رمضان إن هذا الراجل – مبارك - لم يضبط مرة واحدة طوال حكمه وهو يحفظ بيتًا واحدًا من الشعر العربى، ولم يستشهد بمثلٍ أو بحكمةٍ عربية قديمة، بل كان دائماً مثالاً على الجهل الكامل بكل الفنون وعلى رأسها الشعر، مضيفًا "حتى أننى أكاد أظن أن تعيس الحظ "جابر عصفور" حينما أطلق على زمننا تسمية "زمن الرواية"، كان يراعى جهل سيده، وكراهيته للشعر".

وتابع "رمضان" ما فاتنى حقيقةً أن أسمعه بأذنى وهو يلقى هذا البيت، لأن إلقائه بالتأكيد مثالاً على الجهل ومدعاة للسخرية، ومحاميه الفطن الذى لقنه هذا البيت، مضيفًا "كنت أتمنى أن أراه أمامه وهو يحرك شفتيه كملقن"، مؤكدًا "مهانة مبارك زادت عندى بإلقائه لهذا البيت لأنه بالتأكيد إلقاء يشبه إدخال سبابته فى أنفه كلاهما يثير السخرية، وبنومه على السرير وبنظارته السوداء الشمسية وبحراسة ابنيه له ومحاولات إخفائه عن العيون، وببيت الشعر هذا هو جامع السخريات".

أما الشاعر والمترجم رفعت سلَّام، فضحك وقال "والله مفاجأة"، ليضيف: حتى القتلة يستنجدون بالشعر وقت الحساب، وأشك أن "مبارك" يعرف البيت من تلقاء نفسه، ومن المؤكد أن الدفاع هو من لقنه إياه.

وأشار "سلاَّم" إلى أن كل ممارسته وحياته لا علاقة لها بأى روح شعرية، وأن "مبارك" كان فظًا غليظ القلب طول سنوات حكمه، وأنه من الغريب الآن أن يستجدى التعاطف بالشعر، ولا بد أن الدفاع هو الذى أوهمه أن هذه الحركة سوف تستدر عطف الجمهور، على نحو ما فعل فى خطابه الثاني، فهذه البلاد التى يدعى أنها جارت عليه هو قاتلها وهو الذى مثل بجثتها وليس أحدًا أخر، مؤكدًا على أن هذا التصرف من الأفعال النفسية للمجرمين الذين يستجدون عطف البسطاء حينما يتم الإمساك بهم متلبسين، والدماء على أيديهم.

المصدر : اليوم السابع

كوكو

يا شعب مصر - تميم البرغوثي

يا شعب مصر اللى سابقه ضحكته غضبه
ما يطلع الصبح إلا وصحبتك سببه
يا مخلص الأرض من وحشتها فى الأكوان
يا حجة الشمس تفضل طالعة ساعة كمان
مستأذنة وهى مش عادتها الاستئذان
متونسة بالميدان وبعشرته ونسبه

يا شعب يا مصلي قدام العساكر صف
يجري الجريح من ورا لقدام لا خاف ولا خف
تدوس عليه العربية تحوله لميت ألف
يا للعجب يقتلوه ويتوقعوا هربه
يا للعجب يقتلوه ويتوقعوا غيابه
اللي اتقتل لسه واقف هو واصحابه
ما بهدل الامن غير من ماتوا واتصابوا
والصبح ما نور الا اما الشموس غربوا

اضرب عليا انا مش جاري يا قناص
من امتى خوفنا يابن الكلب ضرب رصاص
كل اللي شاف الشهيد بقى تاره تاره الخاص
الدم صاحي وعنيد ولا تقبلوش تربه

يا شعب ياللي دفع تمن الشوارع دم
احفظ اسامي اللي ماتوا في الشوارع صم
الشارع اللي اصطفى وقصر الامارة لم
ملوك قليلة الرباية ركبوا واتركبوا

- يتبع -

كوكو

شعب بغزالة اتخنق قلب التاريخ في يومين
لابس عباية جحا وهو صلاح الدين
بيكرم الانبيا ويهزأ السلاطين
والفجر خيله وحبات الرمال عربه

يا شعب مصر أكم فرعون وفرعونة
ضربتهم ضرب سجادة في بلكونة
ضرب الملوك تربية صالحة ومضمونة
ما يبقوا بني أدمين إلا إذا اضربوا

ضرب الملوك مصلحة
ضرب الملوك تأديب
محلى المماليك وهي بتجري في السراديب
ولولا ضرب شجرة الدر بالقباقيب
مابين أغا وباش أغا كان التتار غلبوا

بعدين مبارك سادات فاروق ماحدش دام
هو احنا شعب كده ما بيعيشلناش حكام
عقبال جيرانا وحبايبنا كمان يا سلام
لو كل من له رئيس نصحى نلاقيه قلبه

- يتبع -

كوكو

يا مصر لسه ولسه الثورة بلة ريق
ما ينتهيلك طريق الا ويبدا طريق
يا شعب مصر تعالى نتفق يا شقيق
رج الملك قبل ما تنعم عليه بلقبه

رجه كده شوفه ان كان الملك شغال
واسأل عليه المكوجي واسأل عليه البقال
واهم حاجة في صفاته انه يكون يتشال
متربي عال لما يمشي يلتزم أدبه

بتكون في أحسن حالاتك وانت مش محكوم
بتبقى رايق ولا ظالم ولا مظلوم
بعدين ده إيه الغبي ده اللي يهددك بالشوم
يا مخلي ألف احتلال ينزل على ركبه

يا شعب إنت اللي كارم كل من حكمك
الدولة دي عارفة تحكم بس من كرمك
كشر لها وهي حتجيلك تبوس قدمك
مافيش حاجة اسمها مليون راجل اتغصبوا

- يتبع -

كوكو

سايق عليك النبي ما تقول كفاية يا شيخ
الملحمة لما تخلص يبدأ التاريخ
وبكرة جاية حروب فيها بكا وصريخ
وبكرة نصرك يخض الشمس من لهبه

سايق عليك النبي ما تقول كفاية كده
من النهاردة انتصاراتك حتبقى كده
يا شعب مصر اللي رجالته وبناته كده
حلال عليه لبن العصفورة لو طلبه

سايق عليك النبي ما تقول كده كفاية
إفرح وكمل وما تقولشى كده كفاية
الثورة دى بداية زى الهجرة والميلاد
الثورة دى بسملة كمل بقى الآية

مع كل مرة قراية حسنها يزداد
والآية تجرى تسلم أختها الراية
من غير نهاية وحتى الوقف مش معتاد
وبكرة أيامنا تبقى حكاية ورواية
عن ناس يباتوا حفايا يصبحوا أسياد

- يتبع -

كوكو

خمسة وعشرين يناير يا شباب حصل ايه
لو قلنا يعنى على الساعة تلاتة الفجر
فى حد فينا طِوِل أو جد حاجة عليه
أو جاب سلاح أو ملايكة بشروه بالنصر
كان اختلف فينا إيه عن أى يوم قبليه
نمنا غلابة، صحينا احنا ولاة الأمر
كان عرش مصر ف أُوَضْنا واحنا ناسيينه
راميين هدومنا على شماله وعلى يمينه
طردنا عنه الحرامى غصب عن عينه
ونزلنا ع الميادين بإدينا شايلينه

بقوا الملوك فى الشوارع والعبيد فى القصر
وف يوم وليلة اكتشفنا ان احنا والنبى مصر
ومصر مش حد تانى غيرنا يعنى يا بيه
وكل واحد سأل طب كنا ساكتين ليه

وشعب مين اللى كانوا الزُّطِّ حاكمينه
بدولة شومة ومختومة بختم النسر
وكل واحد قرا اللى كان على جبينه
رفع بدمه يمينه هْدية وهداية

لو كانت الأنبيا ع المية مَشَّاية
لاجلك يا مصر مشينا باسمين ع الجمر
يا مصر وافتكرى أصل الدنيا نسايه
الملك ده حقنا ومفيش فراعنة جداد

إفرح وكمل وما تقولشى كده كفاية
الثورة ده بداية زى الهجرة والميلاد
مش بس مصر اتغيرت من وقفة الميدان
فيه مساحة ضلمة نورت فى طبيعة الإنسان

- يتبع -

كوكو